2 апрельдә Санкт-Петербургта, Тамбасов ур., 63 адресындагы Тимерьюлчылар мәдәният йортында, бар татар һәм башкорт яшьләренә таныш артист Элвин Грей концерт бирде. Аны Санкт-Петербург татар һәм башкорт яшьләренең “Питер буйлары” оешмасы оештырды, моның өчен бу оешманың рәисенә Юлия Хучашевага рәхмәтләр әйтегез, кызлар!

Элвин Грей (чын исеме Радик Юлъякшин) – бик популяр яшь башкорт артисты, ләкин аны Татарстанда да яхшы беләләр: анда ул үз концертына хәтта бөтен стадион җыя ала. Ул татарча да, башкортча да, русча да җырлый, репертуарыннан җырларның күбесе яшьләр арасында популялыкка ирешкән, аларны еш кына дискотекаларга ишетергә була. Менә нәкъ дискотекага Элвин Грейның концертлары әверелә дә: тамашачыларның күбесе, оялмыйча, кәнәфиләреннән торып, залда бии башлыйлар! Шулай бездә дә булды.

Петербургтагы концертында Элвин күп популяр җырларны: “Туган як”, “Салкын чәй”, “Әлдермешкә кайтам әле”, “Яз килә”, “Уфтанма” һ. б. җырлады, тамашачыларга һәр җыр да ошады. Тамашачыларның күбесе җырларның татарча текстларын үзләре дә белгән икән: алар артист белән бергә, кушылып җырладылар. Менә нинди милли-музыкаль бердәмлек! Үз иҗаты белән Элвин Грей татар җырларын гына түгел, татар телен дә популярлаштыра дип шикләнмичә әйтергә була. Хәзерге татарча еш сөйләшмәүче, туган телен югалта баручы яшьләргә аның җырлары кызык булган сәбәпле, яшьләр үз мәдәниятеннән аерылмый, туган теле белән яңадан кызыксына башлый. Артистка бүләк бүләк итәр өчен сәхнәгә менгән Ася-Августа Никифорова бөтен залга нәкъ шулай әйтте: “Радик, мин сиңа бик рәхмәтле, син мине татар телен өйрәнергә рухландырдың!” Элвин Грейга үзенә дә моны ишетергә бик күңелле булды.

Шул да әйтелмичә калмасын: концерт алдыннан Элвин Грей Сугышлар ветераннары госпиталендә Махсус хәрби операциядә катнашып яраланган гаскәриләргә кереп чыкты. Концерт уртасында исә ул гаскәриләрне сәхнәгә чакырды, һәм аларга “1941 – 1945 еллардагы Бөек Ватан сугышында Җиңүгә 80 ел” юбилей медальләр тапшырылды. Җырчы тарафыннан безнең заман каһарманнарына әйтелгән рәхмәт сүзләренә бар зал да кушылды.

Концерт бар тамашачыларның, аеруча кызларның, йөрәкләрендә тирән тәэсир калдырган. Петербург татарлары һәм башкортлары Элвин Грейга үзләренә куаныч бүләк иткәне өчен бик рәхмәтле.

Түбәндә концертның фотогалереясын карагыз:

Максим Кузнецов,
КФҮ фәнни хезмәткәре.