8 июльдә Татар мәдәни үзәгенә Санкт-Петербург кино һәм телевидение дәүләт университеты студентлары Ринат Абдуллин һәм Камилә Сарыймова килделәр. Алар үз уку практикасы кысаларында Татар мәдәни үзәге тормышына һәм Төньяк башкалада күренекле татарлар турында хәтер саклауга багышланган репортажлар төшерергә тиеш.

Аларга ярдәм итәргә Санкт-Петербург татар милли-мәдәни автономиясе рәисе Рәис Яркәев, күптән түгел «Татарстан Республикасы алдындагы казанышлар өчен» ордены белән бүләкләнгән аның урынбасары Шамил Алюшев, «Ак калфак – Нева» Санкт-Петербург татар хатын-кызлары иҗтимагый оешмасы рәисе, КФУ Каюм Насыйри институты белем бирү һәм мәдәният үзәге татар теле курслары методисты Фирая Рәшитова һәм аның ярдәмчесе, Казан фәнни үзәге гуманитар лабораториясе фәнни хезмәткәре, Россия халыклар дуслыгы университеты аспиранты Максим Кузнецов риза булдылар.

Ринат һәм Камилә, бар хөрмәтле респондентлар белән дә әңгәмәләр язып куйгач, нәтиҗәләр белән канәгать калдылар. Рәис Яркәев аларга 2021 елда Татар мәдәни үзәге ачылуы турында сөйләде, Шамил Алюшев «Нур» беренче татар газетасына һәм Җәмигъ мәчетенә нигез салучы Гатаулла Баязитов һәм милли үзаңны саклау мөһимлеге турында үз фикерләрен уртаклашты, Фирая Рәшитова татар теле курслары эшләве һәм иҗтимагый эше турында сөйләде. Максим Кузнецов белән әңгәмә язып кую өчен, яшьләр Таврический бакчасына китеп бардылар, анда Максим яшь репортёрларга үз татар теле дәреслеге һәм татар телен өйрәнүгә ничек килгәне турында сөйләде.

Ринат һәм Камиләнең үз репортажларын тиздән ясап бетерәчәгенә һәм аларны безнең белән уртаклашачагына ышанабыз!